A adecuación

A adecuación dun texto consiste na elección da variedade de lingua axeitada a cada situación comunicativa. Debemos adaptar o tipo de lingua que empregamos segundo as persoas ás que nos diriximos, o lugar e momento en que esteamos ou a canle de comunicación que utilicemos. Non escribimos igual unha mensaxe de móbil ca unha carta para as nosas amizades: usamos distintas canles e acomodamos a lingua a elas. Agora fíxate no seguinte texto:

De camiño á casa da súa avoa, Carapuchiña Vermella viuse abordada por un lobo que lle preguntou que levaba na cesta.
-Unhas saudábeis viandas para a miña avoa, quen, sen dúbida ningunha, é quen de coidar de si mesma como persoa adulta e madura que é -respondeu.
-Non sei se sabes, querida -dixo o lobo-, que é perigoso para unha rapaciña percorrer soa estes bosques.
Respondeu Carapuchiña:
-Encontro esa observación sexista e extremadamente insultante, pero farei caso omiso dela debido á túa tradicional condición de proscrito social. E , agora, se me desculpas, debo continuar o meu camiño.

James Finn Garner: Carapuchiña Vermella

A Carapuchiña deste texto non se expresa como acostuman facelo as rapazas da súa idade nin se emprega un vocabulario adecuado a un conto infantil. Neste caso, a inadecuación foi buscada a propósito polo autor para propiciar a nosa reflexión.

Por outra parte, se o teu profesor ou profesora chega á clase e di: "A ver ghichiños, poñédevos a currar a toda pastilla!! Que estou ata as orellas de vervos todo o santo día rascando a barriga!!", quedaredes sorprendidos porque as súas palabras non se adecuan ao nivel de formalidade habitual dunha aula; non obstante, esa mesma persoa pode empregar este tipo de lingua, por exemplo, tomando un café coas súas amizades.

Daquela, debemos aprender a seleccionar o rexistro adecuado a cada situación comunicativa. A grandes trazos, falamos de dous tipos de rexistro:

• Rexistro formal: é o empregado, por exemplo, nas conferencias, nos telexornais, na maior parte da literatura... e é o que ti debes empregar nos teus traballos de aula.
• Rexistro informal ou coloquial: é o que utilizamos a maior parte do tempo na nosa vida cotiá coas amizades e con persoas de confianza.

Cada un deles presenta características propias:

Deberás evitar, polo tanto, que nos teus traballos apareza calquera destes trazos dos rexistros informais.